يا فتاح يا عليم يارزاق ياكريم

صحيت من النوم علي كابوس فظيع يخلي اي طالب في كلية يقوم مفزوع من النوم .
لا مش اللي في دماغك يعني السقوط لا
حاجه اكبر من كده
حلمت اني عميد الكلية ظبطني وانا بغش في الامتحان ولجنه وتحقيق ورفد من الكليه لسنتين اللي مزعلني في الموضوع ان الموبايل اللي كنت بغش بيه اتمسك ودي كارثه لاني شاحته
المهم بصيت في الساعه الساعه 6 الصبح طب اروح فين الساعه دي ؟؟؟؟؟
قلت يالا ادي الواحد من الزهق ياخد دش ( اوعي تفكر اني باخد الدش للزهق بس )
المهم ان القصه معروفه ليكم لانها بتحصل كتير وانت في قمة الانسجام المية تقطع والصابون في عينك
طيب الواحد خرج وهو بيضحك
ويفتاح ياعليم يارزاق يا كريم
قلت اعمل فيها واد كده جنتل واحضر الفطار للناس اللي نايمة دي
وافتح التلاجه ياد يا تيجر القى التلاجه فاضيه مفيهاش اكل؟؟؟؟؟؟؟
ازاي ده انا لسه جايب تموين الاسبوع امبارح
واجري ادور هنا وهناك احتمال مكنش حطيته في التلاجه وانا بدور ابص القي طرف علبة جبنه تحت سرير الواد صاحبي( احمد حنظله )
صحيته وانا بغلي فين الاكل ياد فتح عينه وقال بكل برود جعت اتعشيت بيه امبارح بالليل
يامفجوع اكل 7 افراد لمده اسبوع علب جبنه واكل عزابي يعني تاكله كده
المهم كمان مفيش فطار مش عارف حاسس ان في حاجه غريبه اليوم ده
(ويا فتاح ياعليم يارزاق ياكريم )
المهم يالا بقى انزل اديها خروجه في البلد اهو يمكن ربنا يهديني واروح احضر محاضره ولا حاجه
المهم شغل يابو التياجر الكاسيت علي راديو سوا خلينا مع مزيكا علي كيف كيفك
وحط المكوه في فيشة الكهربا وطاخ طيخ طوخ قفله في الكهربا والناس قامت جري ايه اللي حصل وبعد شد وجذب وضرب اقنعتهم انهم يروحوا يناموا والا ...........
و(يا فتاح ياعليم يارزاق ياكريم)
وكمان مبقاش في خروج طب اروح اتخمد واتنيل وانام بقى احسن
ولا عندي فكره احسن افضل ارن وارزل علي الناس اللي عندي علي الموبايل الساعه لسه 8 يعني في وقت الحق اصحي الناس
ولسه بطلب اول رقم
لا مش اللي في بالك الموبايل مفرقعش ولا حاجه
لكن سمعت اكتر جمله بنكرهها كلنا في حياتنا في الموبايل
عفوا لقد نفذ رصيدكم ويرجى اعادة شحن البطاقة
و(يااااااا فتاااااااااااااااااااااااااح يااااااااااااااااااعليم يااااااااااااااااااااارزاق ياااااااااااااااااااااكريم)
ياتري اليوم ده كان يوم ايه؟؟؟؟؟؟؟