زهقنا طهقنا واتخنقنا

زهقنا وملينا واتخنقنا
ده حال كل شاب وبنت في مصر دلوقتي
تقدر تقلي ايه خدنا من كدب الحكومه علينا ليل ونهار الاجابه واضحه وصريحه طبعا ولا حاجه
المشكله اللي بجد زهقتني وخنقتني لما احنا جعانين وكحيانين ( كحيان في اللغه الشعبيه علي ما اعتقد معناها بنكح تراب من كتر الفقر )
ايه لازمه التصريحات الغريبه اللي بنسمعها كل يوم في التلفزيون والجرايد ان معدل التضخم تمام والزياده في امان وان البنك المصري هو البنك الوحيد اللي متاثرش بالازمه العالميه وان اقتصاد مصر بخير .
هو فعلا بخير بس مش لينا اخويا الصغير بقاله يومين قارفني عايز شيكولاته بيسمع عنها في التلفزيون ولما رحت اشتريها لقيتها ب 14 جنيه 99قرش يسلام علي زمه الضمير ( قال يعني حيرجعولي القرش ده ) واشتريتهاله هههههههه
نرجع لموضوعنا فعلا في فلوس في مصر وخير كتير امال يعني النيل العظيم اللي بيجري ده ميته بتروح فين ولا الخضره اللي بنشوفها والمعادن اللي بنسمع عنها بتروح فينا ياخونا احنا لازم نعرف الحقيقه لازم نعرف راسنا من رجلينا
احنا كويسين ولا لا هل العيب فينا ولا فين .
انا زهقت
زهقت فعلا من اعلانات التلفزيون المستفزه
زهقت اني افضل احلم احلم بعربيه طولها 10 متر وفيلا وليه ميكنش عندي مركب وكام بنت جميله كده ( معلش بقى يا حبيبتي ما احلام بقه بس انتي الحقيقه كلها ) ما اهي اعلانات قرفانه بيها التلفزيونات
مش عارف ليه ميفكروش يعملوا قناه للاغنياء بس يعلنوا فيها عن الكلام ده ويسيبونا في حالنا
زهقت من الكدب اللي ملونا بيه زهقت من تزييف الحقايق
زهقت من اني حاسس ان بكره اوحش من النهارده مع اني بحاول بكل الطرق اني اخليه اجمل .
قالوا نوفر في النور طفيت الانوار اللي في البيت نوفر في ميه بستحمى مره كل اسبوع نوفر في البنزين الحمد لله معنديش عربيه وعلي ما اعتقد اني مش حجيبها في القريب العاجل يمكن لما يعملوا عربيه بتشتغل بالهوا ولا بالتراب يمكن اشتريها
طب اوفر في ايه تاني ابطل اكل عشان بكره يبقي اجمل وفرنا كل حاجه عشان هما الناس اللي فوق يعيشوا ويتبسطوا واحنا نشد الحزام نشد الحزام لحد ما خلاص الحزام قفل علي بطننا
انا بجد اسف جدا علي كلامي ده
بس ده مش يأس دي حقيقه
حقيقه ولازم نناقشها ونكملها مع بعض الي لقاء اخر مع كتابات شاب زهقان جدا جدا جدا جدا